Waziri Mhagama aibana Halmashauri ya Meatu, aitaka kuwasaidia vijana

Halmashauri ya Wilaya ya Meatu imeombwa kuwatengenezea mfumo wa kibiashara vijana wa Meatu Milk ili waweze kuboresha na kuendeleza bidhaa ya maziwa yanayotengenezwa na kiwanda hicho.

Rai hiyo imetolewa na Waziri wa Nchi Ofisi ya Waziri Mkuu Sera, Bunge, Kazi, Vijana, Ajira, na Walemavu Mhe. Jenista Mhagama alipotembelea kiwanda Meatu Milk na kufungua jiwe la uzinduzi wa mradi wa kusindika maziwa katika Halmashauri ya Meatu Mkoani Simiyu.

Mhe. Jenista amesema kuwa mradi wa usindikaji maziwa ni mradi utakaowavuta wafugaji wengi kuondokana na tatizo la kuangaika na mifugo yao kwa sababu soko la maziwa litakua la uhakika hivyo kupanua uchumi wa Wilaya ya Meatu.

“Twendeni tukafungue matendo kwa vijana wa Tanzania tuwaondoe katika mitazamio ya fikra hafifu na kuwapeleka katika kujitegemea ili wajenge taifa letu na kuondokana na dhana ya umasikini waliyoikumbatia kwa muda mrefu,” alisema Mhe. Jenista.

Naye Mkuu wa Mkoa wa Simiyu Mhe. Anthony Mtaka amemwambia Mhe. Jenista kuwa hatamualika Simiyu kufungua makongamano na warsha za ujasiriamali bali ataendelea kumualika katika Mkoa wake kwa ajili ya kufungua viwanda vingine vya vijana kwani mkoa umejipanga kuwa na viwanda vya kutosha vitakavyozalisha malighafi zote zinazopatikana Mkoani Simiyu.

Mhe. Mtaka amewaomba wana Meatu na wananchi wote wa Simiyu kuwa na uthubutu wa kubuni miradi endelevu ili waweze kujivunia vya kwao kwani Mkoa umejichagua kuwa pacha wa kutekeleza Ilani ya uchaguzi sambamba na Rais Mhe. John Pombe Magufuli na kuweza kuiongoza nchi kufukia malengo ya Ilani ya Chama tawala kwa vitendo.

Aidha Mwenyekiti wa Meatu Milk Bibi. Lightness Benedictor amesema kuwa mradi umegharimu kiasi cha shilingi 34,903,000 ambapo shilingi 10,000,000 ni michango ya wanachama kutoka kwenye gawio ya fedha za mkopo uliotolewa na Wizara kutoka Mfuko wa Maendeleo ya Vijana na kiasi cha shilingi 24,902,000 ni mkopo kutoka kwenye asilimia tano ya mapato ya ndani ya Halmashauri ya fedha zilizotengwa kuwezesha vijana.

Mradi wa Meatu Milk unatekelezwa chini ya mpango mkubwa wa kiuchumi wa Mkoa wa Simiyu wa kuanzisha bidhaa moja kwa Wilaya moja ili kutekeleza Ilani ya Uchaguzi ya Chama cha Mapinduzi ya mwaka 2015/2020 ya kuwa na Tanzania ya viwanda.