Wasichana wa Ifakara waiomba Serikali kuongeza adhabu kwa wanaosababisha mimba za utotoni

 

 

  

Wasichana wanaoishi Ifakara, Wilaya ya Kilombero, Mkoani Morogoro wameiomba Serikali kuongeza adhabu kwa wanaume wanaosababisha mimba za utotoni ili kukomesha tatizo hilo.

 

Maombi hayo yametolewa leo na Mwanafunzi wa Shule ya Sekondari ya Ifakara Jackline Mwalusako ambaye amekaimu nafasi ya Meneja Miradi wa Shirika la Plan International- Ifakara kama ishara ya kuadhimisha Siku ya Msichana Duniani itakayofanyika Oktoba 11 mwaka huu.

 

Mwalusako amesema kuwa mila potofu pamoja na ndoa za utotoni ndio chanzo kikubwa kinachosababisha kuongezeka kwa mimba za utotoni kwahiyo kuna haja ya kubuni mbinu mpya zitakazotokomeza tatizo hilo.

 

“Pamoja na adhabu zilizowekwa kwa ajili ya kuwaadhibu wanaume wanaosababisha mimba za utotoni bado idadi ya wasichana wanaopata mimba za utotoni inaongezeka, hivyo tunaiomba Serikali iwaongezee adhabu wanaofanya makosa hayo ili kuzuia tatizo hili”, alisema Mwalusako.

 

Mwalusako ameongeza kuwa wazazi pia wanachangia wasichana kupata mimba za utotoni kwani wanakubali kuwaozesha watoto wao wakiwa bado wadogo kwahiyo nao wanatakiwa kupewa adhabu ili waachane na tabia ya kuwaozesha kabla ya muda muafaka.

 

Kwa upande wake mwanafunzi anayekaimu nafasi ya Mratibu wa Miradi ya Shirika la Plan International, Deborah Mtiko ametoa rai kwa shule mbalimbali kuongeza utoaji wa elimu kuhusu mimba za utotoni ili kuwapa uelewa wasichana waliopo mashuleni.

 

Mkoani Morogoro, Shirika la Plan International – Tanzania linaadhimisha Siku ya Msichana Duniani katika Kijiji cha Ihenga kilichopo mkoani humo kuanzia saa  tatu kamili asubuhi.